Бидний тухай - Монголын Тариаланчдын Үндэсний Холбоо

Ерөнхийлөгчийн мэндчилгээ

Эрхэм хүндэт тариаланчид аа,

Та бүхэндээ арвин их ургацтай, амжилт бүтээлээр дүүрэн байхын өлзийт ерөөлийг өргөн мэндчилэе.

Монгол Улсын Засгийн газраас гурван тулгуурт хөгжлийн бодлогыг тодорхойлон, хөдөө аж ахуйг тэргүүлэх салбар болгон хөгжүүлэх, тэр дундаа газар тариалангийн бүс нутгийг тогтоосноор хөдөлмөр бүтээл, хөрөнгө оруулалтыг дэмжсэн шийдвэрийг гаргасан нь тус салбарын хөгжилд томоохон суурь нөхцөлийг бүрдүүллээ.

Монголын Тариаланчдын Үндэсний Холбоо нь хөрсийг сайжруулах, шинжлэх ухаан, технологийн дэвшилд тулгуурласан газар тариалангийн үйлдвэрлэлийг эрчимжсэн мал аж ахуйтай хослуулан хөгжүүлэх, үйлдвэрлэсэн бүтээгдэхүүнээрээ дотоодын хэрэгцээгээ бүрэн хангаж цаашид экспортлох, өндөр боловсрол, арвин туршлагатай хүний нөөцийг бүрдүүлэх зэрэг олон талт асуудлуудыг шийдвэрлэхээр салбарын яамтайгаа хамтран ажиллаж байна.

2019 он Монгол улсад Атар газар эзэмшсэний түүхт 60 жилийн ой тохиох бөгөөд Засгийн газраас тогтоол гаргаж тус ойг угтсан олон бүтээлч ажлуудыг МТҮХ-той хамтран орон даяар өрнүүлэн, үр бүтээлтэй тэмдэглэн өнгөрүүлэхээр хичээн ажиллаж байна.

Тариаланчид бид ургацын хэмжээ, чанараас гадна амьдралын эх булаг болсон хөрсний үржил шимийг сайжруулах тал дээр онцгойлон анхаарч ажиллах үүрэгтэйг цохон тэмдэглэж байна.

Сайн үйлс бүхэн дэлгэрэх болтугай.

УИХ-ЫН ГИШҮҮН, МТҮХ-НЫ ЕРӨНХИЙЛӨГЧ Ж.ЭНХБАЯР

Зорилго, үнэт зүйлс

ҮНЭТ ЗҮЙЛС

Алсын хараа

Эв нэгдэл, Шимт хөрс

ЗОРИЛГО

Монголын тариаланчдыг нэгтгэн хүчирхэгжүүлж,

газар тариалангийн бизнесийг дэлхийн жишигт хүргэж,

улс орны эдийн засгийн хөгжлийн тулгуур байна.

ЗОРИЛТ

Монголын тариаланчдын хүчирхэг нэгдлийг бий болгоно.

Улсын хүн амыг эрүүл, тэжээллэг хүнсээр тогтвортой хангана.

Монгол улсын эдийн засгийн хөгжлийн тулгуур нь байна.

Олон улсын түвшинд Монголын тариаланчдыг төлөөлнө.

Үйл ажиллагааны чиглэл

Монголын газар тариалангийн үйлдвэрлэлд дэлхийн жишигт хүрсэн техник, технологи, инновацийг нэвтрүүлэх.
Газар тариалангийн салбар, тариаланчдын эдийн засаг, бизнесийн талаарх хууль эрх зүйн орчныг боловсронгуй болгох, хөгжлийн бодлогын асуудлаар төрийн байгууллагуудтай хамтарч ажиллах.
Хөрс хамгаалах, байгаль цаг уурын нөхцөлд зохицсон өндөр ургацтай үрээр хангах, өндөр бүтээмжтэй, хөрсөнд ээлтэй орчин үеийн техник, цомхтгосон болон тэг элдэнэшүүлэлт нэвтрүүлэх, сүрлэн хучлага бий болгох, усалгаатай тариалангийн технологийг боловсронгуй болгох.
Ээлжлэн тариалалтын системийг нэвтрүүлэх, газар тариалангийн үйлдвэрлэлийг мах, сүү, гахай, шувуу, тэжээлийн үйлдвэртэй хослуулан эрчимжүүлэн цогцоор хөгжүүлэх.
Хамгаалагдсан хөрсний тариалалт, тариалангийн талбайг хашаажуулах, ойн зурвас байгуулах, жимс жимсгэний аж ахуй, боловсруулах үйлдвэрлэл хөгжүүлэх.
Хөдөө аж ахуйн чиглэлийн мэргэжлийн холбоо, эрдэм шинжилгээний байгууллага, гурил үйлдвэрлэгчид, төрийн бус байгууллага, олон улсын байгууллага, ижил төстэй гадаад дотоодын холбоодтой харилцан ашигтай хамтарч ажиллах.
Тариаланчдад хангамж, хадгалалт, даатгал, санхүү зээлийн үйлчилгээ үзүүлдэг байгууллагуудтай харилцан ашигтай хамтран ажиллах.
Гишүүдээ төлөөлөн гадаад, дотоодын хөрөнгө оруулагчдыг татах, хөрөнгийн зах зээлд гарах, бүтээгдэхүүнээ экспортод гаргахад дэмжих, гишүүддээ үйлчлэх, техник үйлчилгээний дундын төв бий болгох.
Холбооны гадаад, дотоод харилцааг хөгжүүлж, гишүүдээ сургалтанд хамруулах, уулзалт, зөвлөгөөн , танилцах аялал зохион байгуулах, яармаг худалдаанд оролцох, төсөл хэрэгжүүлэх, мэдээ мэдээллээр хангах.
Тариаланчдынхаа нийтлэг эрх ашгийг хамгаалах, гишүүдийнхээ үйл ажиллагааг дэмжих.