Монгол Улсын Ерөнхийлөгч У.Хүрэлсүх, Хүнс, хөдөө аж ахуй, хөнгөн үйлдвэрийн сайд З.Мэндсайхан болон УИХ-ын гишүүд Хэнтий аймгийн Хэрлэн сумын хүнсний ногоочидтой уулзаж, санал сэтгэгдлийг нь сонслоо. Ногоочдын зүгээс намар ургацаа хурааж авах хүн хүч, байгалийн давагдашгүй хүчин зүйл зэрэг эрсдэлээс хүнсний ногоог хэрхэн хамгаалах зохицуулалтыг холбогдох хуульд тусгах, ногооны үнийг тогтвортой байлгах, тариалангийн бүс нутагт эрчимжсэн мал аж ахуйг хөгжүүлэх бодлогыг эрчимтэй хэрэгжүүлэх шаардлагатай байгааг хэллээ.
“Монгол Улсын Ерөнхийлөгчийн санаачилсан “Хүнсний хангамж аюулгүй байдал” хөдөлгөөний хүрээнд ирэх 5 жилд хөдөө аж ахуйн салбараа бүрэн дэмжиж, хөгжүүлнэ. Үүний тулд нэн тэргүүнд хэрэгжүүлэх гол ажил хүнсний ногоочдоо механикжуулах юм. Ногоочин бүр трактортай байх шаардлагагүй. Харин ногоочид нэгдэн хоршоо болж, дундын техник үйлчилгээтэй болох нь хамгийн зөв шийдэл. Дундын техник үйлчилгээтэй болсноор хураан авах ургацын өртөг зардал буурч, импортын ногоотой үнээрээ өрсөлдөх боломжтой болно.” гэдгийг сайд З.Мэндсайхан уулзалтын үеэр онцолж байсан юм.
Тиймээс Хэрлэн сумыг дундын техник үйлчилгээний төвтэй болгох зорилтын эхлэл болгож 32 морины хүчтэй хоёр тракторыг хүлээлгэн өглөө.
Түүнчлэн Хэрлэн сумын 700 га төмс, хүнсний ногооны талбайг Азийн хөгжлийн банкны санхүүжилтээр усалгааны системтэй болгох төсөл хэрэгжүүлж байгаа юм. Гүйцэтгэгч компани бүтээн байгуулалтын ажлаа эхлүүлсэн бөгөөд хоёр жилийн дараа бүрэн ашиглалтад оруулахаар ажиллаж байна. 700 га талбай усалгаатай болсноор Хэрлэн сумынхан аймгаа төдийгүй зүүн бүсийг төмс, хүнсний ногоогоор хангах боломж бүрдэнэ.
Хэнтий аймгийн Хэрлэн суманд 13 аж ахуйн нэгж, хоршоо, 15 иргэн гэр бүлийн хамт 96,6 га талбайд төмс, хүнсний ногоо, 2000 метр квадрат зуны, 680 метр квадрат 3 улирлын хүлэмжид тариалалт хийдэг. Мөн 28 га ногоон байгууламж болон хамгаалалтын зурвастай, мод үржүүлэг хийдэг, чацарганын аж ахуй эрхэлдэг гээд эх орноо эрүүл хүнсээр хангахад чухал үүрэгтэй хөдөлмөрчид юм.
Энэ жилээс эхлүүлж буй хүнсний ногооны урамшуулалд хамрагдахын тулд үйлдвэрүүд, агуулахад ногоогоо өгөхдөө баримтуудаа сайн бүрдүүлж, татварын албандаа өгөх хэрэгтэй. Урамшуулалд хамрагдсанаар ирэх жил хөнгөлөлттэй зээлд хамрагдахад томоохон дэмжлэг, хөшүүрэг болно. 06 дугаар сарын 04-ны байдлаар Хэрлэн сумын 2 хоршоо, 2 ногоочин 150 сая төгрөгийн хөнгөлөлттэй зээл авсан дүнтэй байна.
ЭХ СУРВАЛЖ: ХҮНС, ХӨДӨӨ АЖ АХУЙ, ХӨНГӨН ҮЙЛДВЭРИЙН ЯАМ